രാജിന്റെ “ഗാര്ഹിക സത്യങ്ങള്” എന്ന കവിത വായിച്ചപ്പോള് തന്നെ കമന്റിടണമെന്ന് കരുതിയതാണ്. കവിത നന്നായിട്ടല്ല, കവിതയില് അര്ത്ഥശങ്കയ്ക്ക് ഇടം നല്കുന്ന പ്രയോഗങ്ങള് ഉള്ളതിനാല്. രാജുമായി ഇതെപ്പറ്റി ചാറ്റ് ചെയ്തിരുന്നു.തുളസിയുടെ ബ്ലോഗില് വന്ന “ജനാധിപത്യമാണ് മറുപടി” പോസ്റ്റിന് വന്ന മറുപടികള് കണ്ടപ്പോള് ഞാനിടാനുദ്ദേശിച്ച കമന്റ് ഒരു പോസ്റ്റാക്കിക്കളയാമെന്ന് തോന്നി.
ആദ്യമേ തന്നെ പറയട്ടെ, രാജിന്റെ “ഗാര്ഹിക സത്യങ്ങള്” എന്ന കവിത വായിച്ചവരാരും കവിതയല്ല വായിച്ചതെന്ന് തോന്നുന്നു. രാജിന്റെ കവിതയൊരു നായര്-ഈഴവ വിവാദത്തിന് വഴിവയ്ക്കുന്നുണ്ടെന്ന് എനിക്ക് തോന്നിയിട്ടില്ല. ചിലപ്പോള് എന്റെ തോന്നലാവാം. എന്തായാലും ഞാനീ കവിത ഇങ്ങനെയാണ് വായിച്ചത് -
------------------------------------------------------------------
കല്യാണപ്രായക്കാരനായ ഒരു നായര് മാട്രിമോണിയല് സൈറ്റില് കയറി രജിസ്റ്റര് ചെയ്യാനൊരുങ്ങുന്നു. ജാതിയിലോ മതത്തിലോ വിശ്വസിക്കാത്ത ഇയാള് “ജാതിയില്ല” എന്ന ഓപ്ഷന് തിരഞ്ഞെടുക്കാനാണ് ആഗ്രഹിച്ചത്. ചാള കഴിക്കുന്ന ഈഴവന്മാര്ക്ക് ചാള മണമുണ്ടെന്ന് പണ്ടെന്നോ ഇയാളുടെ മനസ്സില് കയറിപ്പറ്റിയിട്ടുണ്ട്. “ജാതിയില്ല” എന്ന ഓപ്ഷന് തിരഞ്ഞെടുക്കുന്നതിലൂടെ, തനിക്ക് ലഭിക്കുന്നത് ഒരു ഈഴവപ്പെണ്കുട്ടിയെ ആയാലോ എന്ന് ഒരുനിമിഷം ഈ നായര് ചിന്തിച്ച് പോവുന്നു. ജീവിതകാലം മുഴുവന് തന്റെ കൂടെ കഴിയാന് പോവുന്ന പെണ്കുട്ടി, തനിക്കിഷ്ടമില്ലാത്ത ചാളമണം ഉള്ളവളായാല് ജീവിതം മൊത്തം ചളമാവും എന്ന തിരിച്ചറിവില് നായരെത്തുന്നു.
ജാതിയും മതവുമില്ല എന്ന് വിശ്വസിക്കുന്ന താന് “ചാളമണം” ഉണ്ടെന്നതിന്റെ പേരില് ഈഴവപ്പെണ്കുട്ടിയെ ഒഴിവാക്കുന്നതിന്റെ ഔചിത്യമില്ലായ്മയും ഈ നായരെ വിഷമിപ്പിക്കുന്നുണ്ട്. അങ്ങിനെ, “ത്രിശങ്കുസ്വര്ഗ്ഗത്തില്” നില്ക്കുന്ന തനിക്ക് കല്യാണപ്രായമായിട്ടില്ല എന്ന് മനസ്സിലാക്കുകയാണ് കവിയിവിടെ.
------------------------------------------------------------------
തീര്ത്തും വൈയക്തികമായ ഒരു വിഷയം, അര്ത്ഥശങ്കയ്ക്ക് ഇടം കൊടുക്കാത്ത ഭാഷയില് അവതരിപ്പിക്കാന് കഴിയാത്ത സാഹചര്യത്തില് പ്രകാശിപ്പിച്ചുവെന്ന തെറ്റ് രാജിവിടെ ചെയ്തിരിക്കുന്നു. എങ്കിലും ഇതൊരു വൈയക്തിക കവിതയാണെന്നുള്ള രാജിന്റെ മുന്കൂര് ജാമ്യവും കവിതയ്ക്കവസാനം കവിക്കുണ്ടാവുന്ന പരിണാമവും കണക്കിലെടുക്കുമ്പോള് കുറച്ചുകൂടി മെച്ചപ്പെട്ടൊരു വായന ഈ കവിത പ്രതീക്ഷിക്കുന്നുണ്ടെന്നാണ് എന്റെ അഭിപ്രായം.
ലോഡുചെയ്യുന്നു...
പ്രതികരണങ്ങള്